Foto: Kryeministri i Qeverisë së Republikës së Kosovës, Hashim Thaçi

PRISHTINË,6 MARS 2010(VushtrriaPress)-“Integriteti territorial i Kosovës është i paprekshëm, i njohur dhe i garantuar ndërkombëtarisht, dhe Kosova me këto kufij do të integrohet në NATO dhe në BE”, ka thënë kryeministri Hashim Thaçi. Kryeministri Hashim Thaçi ka vlerësuar se gjendja e sigurisë është mjaft stabile dhe se i ka kontribuar integrimit të pjesëtarëve të të gjitha bashkësive në jetën institucionale dhe shoqërore.Kryeministri Thaçi ka ripërsëritur se ndër sfidat më të rëndësishme të sigurisë në Kosovë është integrimi i pjesës veriore në institucionet e Prishtinës dhe zbatimi i ligjit në këtë pjesë të vendit.”Ne do të angazhohemi në mënyrë gjithëpërfshirëse në krijimin e komunës së re të Mitrovicës veriore, mbajtjen e zgjedhjeve në komunat Zveçan, Leposaviq dhe Zubin Potok. Çështjet sociale dhe ekonomike do të jenë prioritet i qeverisë”, ka thënë Thaçi. “Synimet e strategjisë janë krijimi i mirëbesimit, integrimi i serbëve në jetën politike dhe shoqërore në Kosovë, rritja e tolerancës së ndërsjellë, sundimi i ligjit, zhvillimi ekonomik dhe fitorja e parimeve demokratike në këtë pjesë të Kosovës”, është shprehur kryeministri i Republikës së Kosovës.

Pamje nga mbledhja e sotme e Qeverisë

PRISHTINË,1 MARS 2010(VushtrriaPress)-Në mbledhjen e 111-të, të rregullt të Qeverisë së Republikës së Kosovës, është aprovuar Projektligji për Gjykata në Kosovë dhe Projektligji për ndryshimin dhe plotësimin e Ligjit për Ujitjen e Tokave Bujqësore.Duke riafirmuar angazhimin e Qeverisë së Republikës së Kosovës për reformimin e sistemit të drejtësisë në Kosovë, kryeministri Hashim Thaçi ka thënë se gjykatat në Kosovë, me aprovimin e Ligjit për Gjykatat, do të jenë më efikase dhe do të përmbushin misionin e tyre për zbatimin dhe mbrojtjen e ligjit, duke funksionuar shpejtë dhe drejtë në zgjidhjen e lëndëve gjyqësore.Ligji i ri për gjykatat përcakton formën organizative të gjykatave në Kosovë dhe shtrirjen e tyre në të gjitha qendrat e Kosovës, me shtatë gjykata themelore dhe degët e tyre nëpër komunat e Kosovës.Qeveria ka aprovuar edhe Projektligjin për ndryshimet dhe plotësimin e Ligjit për ujitjen e tokave bujqësore, duke synuar që me këto ndryshime dhe plotësime, ligjin ta bëjë të implementueshëm dhe në pajtim me direktivat e BE-së në këtë fushë.

Qytetarë të nderuar,

Për të mbërritur deri tek Festa e Madhe e Ditës së Pavarësisë së vendit tonë, të gjithë ne së bashku punuam dhe sakrifikuam shumë.

Vizionin tonë të përbashkët dhe universal për liri, pavarësi dhe demokraci në atdheun tonë, e realizuam bashkërisht – me unitet të qëndrueshëm politik dhe qytetar.

Republika e Kosovës, në dyvjetorin e shënimit të Ditës së Pavarësisë, është shtet edhe më i konsoliduar, me institucione stabile dhe efektive, me qeverisje të mirë, sundim të rendit dhe ligjit dhe respektim afirmativ të komuniteteve.

Në vitin e dytë të pavarësisë, Republika e Kosovës ka shënuar suksese të njëpasnjëshme në aspektin politik dhe atë të zhvillimit ekonomik.

Për herë të parë, në Kosovën e pavarur u organizuan zgjedhjet lokale, ku qytetarët tanë në mënyrë të dinjitetshme dhe krenare zgjodhën udhëheqësit e tyre lokalë. Ishin këto zgjedhje të lira, fer dhe demokratike, që u vlerësuan lartë nga të gjithë.

Republika e Kosovës u bë anëtare me të drejta të barabarta e Bankës Botërore dhe e Fondit Monetar Ndërkombëtar.

Me përkushtimin tonë të vazhdueshëm institucional, ne krijuam shumë vende të reja pune me paga të mira, ndërtuam me qindra kilometra rrugë të reja, me dhjetëra shkolla të reja, duke vazhduar kështu përmirësimin e jetës së përditshme të qytetarëve dhe duke mundësuar një të ardhme më të mirë për fëmijët tanë.

Qytetarë të dashur,

Në këto momente të rëndësishme të shënimit të Ditës sonë të Madhe, ne kujtojmë të kaluarën e vendit tonë, e kaluar kjo e ndritshme – themel i fuqishëm i të ardhmes sonë zhvillimore dhe prosperuese.

Ardhmërinë tonë po e ndërtojmë mbi punën e njerëzve tanë anë e kënd Kosovës, që çdo ditë me përkushtimin e tyre të vazhdueshëm, po bëjnë vepra të jashtëzakonshme për vendin.

Ne të gjithë së bashku ndihemi krenarë që ashtu siç e arritëm pavarësinë e vendit tonë, bashkërisht po punojmë çdo ditë për zhvillimin dhe integrimin e Republikës sonë në institucionet euro-atlantike.

Secili qytetar i Kosovës duhet të ndihet krenar për kontributin e tij në realizimin e këtij vizioni.

Qytetarë të dashur,

Derisa po shënojmë Ditën tonë të Pavarësisë, ju ftoj që të festoni me dinjitet dhe krenari, ashtu siç keni festuar gjithherë.

T’i nderojmë heronjtë tanë dhe të kalojmë më shumë kohë me familjet tona, sepse është ditë për t’u krenuar.

Faleminderit.

Gëzuar Dita e Pavarësië!

Hashim Thaçi,

Kryeministër i Republikës së Kosovës

PRISHTINË,16 SHKURT 2010(VushtrriaPress)–Kryeministri i Qeverisë së Republikës së Kosovës, Hashim Thaçi, ka marrë pjesë sot në festimin e ditëlindjes së fëmijëve që kanë lindur më 17 shkurt 2008, në Ditën e Pavarësisë së Kosovës. Në ambientet e Grand Store-s në Prishtinë, kryeministri Thaçi ka takuar shtatë fëmijë dhe prindërit e tyre në dyvjetorin e lindjes, i ka uruar ata të gëzojnë shëndet të mirë dhe të rriten të lumtur në shtetin e Kosovës. Në një fjalë rasti kryeministri Hashim Thaçi ka thënë se është kënaqësi e madhe të takohesh sot me fëmijët, që e kanë ditëlindjen në Ditën e Pavarësisë. “Urime ditëlindja të gjithë këtyre fëmijëve, urime ditëlindja për Kosovën, urime ditëlindja për shtetin tonë, për të ardhmen tonë në NATO dhe Bashkim Evropian, urime për sukseset e mëdha që kemi arritur”, tha kryeministri Hashim  Thaçi. Më tutje kryeministri Thaçi ka pohuar se secili qytetar i Kosovës, secila familje kosovare duhet ta festojë me krenari të madhe këtë ditë historike për vendin tonë, këtë ditë të gëzimit, ditë të krenarisë, vlerave, të respektimit të së kaluarës, të zotimeve për punën e sotme, por para së gjithash edhe për vizionin për të ardhmen. “Secili nga ne duhet të kujtojë të kaluarën tonë të lavdishme, sakrificat e mëdha që kemi bërë për të arritur në këtë ditë, por edhe zotimin tonë për të ardhmen, për një shtet më të zhvilluar, shtet demokratik, shtet të perspektivës evropiane, shtet të zhvillimit, të mirëqenies sociale” tha kryeministri Hashim Thaçi në ceremoninë e festimit të ditëlindjes së fëmijëve që kanë lindur me 17 shkurt 2008, në Ditën e Pavarësisë së Kosovës.Me këtë rast, kryeministri Thaçi shtatë fëmijëve me rastin e dyvjetorit të lindjes, u shpërndau dhurata.

PRISHTINË,16 SHKURT 2010(VushtrriaPress)–Në Odën Ekonomike të Kosovës sot u prezantuan mundësitë e implementimit te pajimeve të Kompanisë së njohur kroate Marus ATM, të cilat gjejnë aplikimin e tyre në industrinë e prodhimit të miellit. Kryetari i Odës Ekonomike të Kosovës Besim Beqaj me këtë rast theksoi se në mes të ndërmarrjeve nga Kosova dhe Kroacia ekziston bashkëpunim i suksesshëm dhe se ardhja e ambasadorit Zlatko Kramariq në Kosove i ka kontribuar zhvillimit të mëtejshëm të bashkëpunimit të gjithanshëm e posaçërisht në lëmin e ekonomisë. Beqaj thekoi se OEK-u është i interesuar që të kontribuoj bashkëpunimit në mes të bizneseve vendore dhe atyre ndërkombëtare dhe se prezantimi i sotëm është kontribut në këtë drejtim. Orientimi parësor i OEK-ut sipas Beqaj është krijimi i kushteve më të mira për bashkëpunim ekonomik ndërkombëtar dhe tërheqja e investimeve të reja në Kosovë, ndërsa sa i përket bizneseve nga Kroacia nuk ka javë që në Kosovë mos të vjen ndonjë kompani nga ky vend, u tha në këtë takim. Zvonimir Perica, nga Marus ATM, theksoi se kjo kompani merret me matës të temperaturave të drithërave në sillosa dhe me mundësitë e kursimeve përmes futjes së kompensimit të fuqisë reaktive në njësi pune dhe se posedon dy certifikata të cilat ia mundësojnë pjesëmarrjen në tregun evropian. Ndryshe MARUS ATM këto pajime i ka aplikuar në më shumë se 1000 ndërmarrje.